慢慢行，唔使急！

生活喺香港呢個人多車多節奏又快嘅城市，最緊要係咩？係快！快！快！💨🏃‍♀️「唔使急，最緊要快！」呢句相信係唔少香港人嘅口頭禪。呢種樣樣都要快嘅生活態度，令到好多狗主都不自覺地將急促嘅節奏融入喺每日同狗狗散步嘅時間。

好多狗主有時會不自覺地，時刻縮短條狗繩，不停催促狗狗：「快啲啦！行啦！唔好聞啦！唔好阻住人啦！」狗狗呢個時候心裡面可能諗：「吓？我地趕著去邊呀？」

狗主可能忘記左，散步喺為左邊個而去行呢？為狗主？還是為左狗狗而去散步呢？

無錯，散步係為狗狗而行㗎，而散步嘅目的好簡單，就係每日令狗狗放鬆身心。有人覺得，散步純粹係比狗狗外出大小便，咁就任務完成！係～～大小便的確係好重要嘅事情，但絕對唔係散步嘅唯一目的！

一個理想嘅散步，包括：

一、比狗狗周圍聞下，收集訊息。邊隻狗狗喺度小便過呢？係唔係我嘅朋友仔呢？定係我嘅frenemy呢？欸！呢棵樹比呀Bobby霸左做地盤嘅！等我喺度小個便打個卡先！咦～呢度之前有人倒瀉嘢啵，陣味咁似爸爸媽咪今朝飲果杯咖啡嘅？

事實上，聞嗅可以令狗狗建立正面情緒，放鬆心情，係散步過程中非常重要嘅部分！亦係佢哋本能嘅基本需要。狗主千奇唔好因為怕污糟、趕時間就唔比狗狗周圍聞，咁樣佢哋都會好緊張㗎！

二、狗主喺安全情況下，讓狗繩保持鬆嘅狀態，等狗狗作主導探索自己想行嘅路線。喺狗主嘅角度，散步就係由A點行到去B點，但對狗狗黎講，其實散步係無一定嘅路線！由A點出發，可能要九曲十三彎中間停十幾次先去到B點，甚至乎連B點都唔使去到，而呢個先係滿足到狗狗探索需要嘅路線。

三、狗主慢慢行，保持心情放鬆，將平靜放鬆嘅情緒氛圍感染狗狗。大家一齊「唔使急，最緊要夠chill～～」。

四、滿足狗狗社交需要，遇到其他狗狗，大家互相聞下屁屁，say個hi，鍾意就玩幾下。唔係幾啱key？咁就「走先啦係咁先啦下次再玩啦！🎶」

每日做到平靜放鬆嘅散步，你可能會發現，放狗散步唔再係例行公事或者一個stressful task，而係一個人狗培養感情默契嘅溫馨活動。狗狗情緒長期黎講會比較平靜放鬆，無咁緊張。如本身有扯繩嘅情況都可能會得以改善添！

總而言之，散步係要滿足狗狗需要，唔係滿足狗主需要！

以上都係筆者本身養兩隻唐狗嘅小小經驗心得，有啲都係過去參與狗隻正向訓練師嘅訓練課程中得到嘅少少知識。不過始終每隻狗狗嘅情況都唔同，有需要嘅話記得要去諮詢獸醫或專業嘅狗隻訓練師喔！